Babar Azam Ka Zabardast Comeback: 52 Balls Par Career Ki Fastest Century 2 sal or 67 innings k intazar k bad

Pakistan Super League (PSL) 11 ka mela apne ikhtetaam ki taraf barh raha hai, lekin Match 29 ne wo karishma dikha diya jis ka intezar sb cricket fans ko do saal se tha. 19 April 2026 ki sham Karachi National Bnak Stadium mein sirf chokay aur chakkon ki barsaat nahi hui, balkay "King" Babar Azam ne apne criticizers ko khamosh karwa kar aik naya itihas raqam kar diya.

Do saal ke mushkil waqt aur 67 innings ke sabar ke baad, Babar Azam ne T20 format mein apni career ki fastest hundred score ki. Is ke saath hi Peshawar Zalmi ne PSL 11 ka ka sab se bara score board par laga kar apni "Unbeaten" hone ki riwayat ko barqarar rakha.

Match ka aghaz Quetta Gladiators ke toss jeetne se hua. Captain ne fielding ka faisla kiya, shayad unhein laga ke wo Zalmi ko kam total par rok lenge. Magar Peshawar Zalmi ke batters ka irada kuch aur hi tha.

Young man Muhammad Haris ne pehle hi over se apne tevar dikha diye. Unhon ne Jahandad Khan ko aate hi 23 runs jarr diye, jis mein do lambe chakkay shamil thay. Haris ki batting ne Quetta ke bowlers ko backfoot par dhakel diya. Agarchay wo 16 runs bana kar Alzarri Joseph ki ball par out ho gaye, magar unhon ne Zalmi ko wo "Powerplay Momentum" de diya tha jis ki zaroorat thi.

Haris ke out hone ke baad maidan mein aaye Kushal Mendis. Phir jo kuch hua wo tareekh ka hissa ban gaya. Babar Azam aur Kushal Mendis ne mil kar Quetta ke bowlers ki kohl dhulai ki. Donon ne mil kar 135 runs ki aisi partnership banai jis ne cricket ke barray barray records hila diye.

Is partnership ki badolat Babar Azam ne West Indies ke legend Chris Gayle ka record tor diya aur "The Great" Virat Kohli ke record ki barabri kar li. Babar Azam ab T20 cricket mein 47 martaba 100+ runs ki partnerships ka hissa reh chuke hain. Ye record dikhata hai ke Babar sirf apne liye nahi, balkay team ke liye kitne baray match-winner hain.

Kushal Mendis ne 83 runs ki dhuan-dhaar inings kheli. Unke out hone ke baad fans ko laga ke shayad run-rate girega, magar Babar Azam ne doosra gear badal liya tha. Unhon ne Pakistan ke behtreen spinner Usman Tariq ko nishana banaya aur aik hi over mein do shandar chakkay laga kr Quetta k bowlers ko Pressure me dal dia ..

Babar Azam jab 98 runs par thay, to poora stadium saans rok kar khara tha. Ye sirf aik century nahi thi, balkay do saal ki mehnat aur tanqeed ka jawab tha. Jahandad Khan ki last ball par Babar ne shot khela aur doosre run ke liye bhage.

Wicket-keeper ne stumps ko hit kiya, Babar ko laga ke wo run-out ho gaye hain. Wo mausi mein pitch par hi lait gaye. Unka chehra udas tha, kyunke wo is milestone ke itne kareeb aa kar har man-na nahi chahte thay. Lekin non-striker end par maujood Aaron Hardie ne unhein bataya ke wo safe hain! 'Not Out' rahy hain, to Babar Azam ki khushi dekhne wali thi. Unhon ne sajda kiya aur Apni hunderd ko celebreate kiya.

PSL Career me centuries

Babar Azam ne sirf 52 balls par apni century mukammal ki, jo unke T20 career ki fastest century hai. PSL mein ye unki 3rd century hai:

1. 2023 mein Quetta Gladiators ke khilaf.
2. 2024 mein Islamabad United ke khilaf.
3. 2026 mein phir se Quetta Gladiators ke khilaf.

Is century ke saath Babar Azam dunya ke doosre player ban gaye hain jinhon ne sab se zyada T20 centuries (12) score ki hain. Is list mein top par Chris Gayle hain (22 centuries). Babar ki umar aur unki form ko dekhte hue ye kehna ghalat na hoga ke wo anay wale saalo mein Gayle ka record bhi tor sakte hain.

Babar ki century ki badolat Peshawar Zalmi ne board par 255 runs ka pahar khara kar diya. Ye PSL ki tareekh ka sab se bara total hai. Zalmi ne apna hi 246 runs ka purana record tor kar naya rasta banaya.

Jawab mein Quetta Gladiators ki team is baray pressure ko bardasht na kar saki aur puri team sirf 137 runs par dher ho gayi. Zalmi ne ye match baray margin se jeet kar PSL 11 mein "Unbeaten" rehne ka aizaz bhi barqarar rakha.

PSL 11 ka Match 29 hamesha Babar Azam ke shandar comeback ke liye yaad rakha jayega. Unhon ne sabit kar diya ke "Form is temporary, but Class is permanent." Unki 52 balls par century ne na sirf Zalmi ko jeet dilayi balkay un tamam critics ke mun band kar diye jo unke strike rate aur T20 batting par sawal uthate thay.

Zalmi ke fans ab umeed kar rahe hain ke Babar isi form ko carry karenge aur Peshawar Zalmi ko aik baar phir PSL champion banwayenge.

Babar Azam's T20 Centuries List (Updated) 2026

Live cricket updates, match stats, aur PSL, IPL aur domestic leagues ki har bari khabar ke liye Zeesports ko follow karein. Real-time player updates, team standings, aur complete match schedules ke saath hamesha game mein aage rahein.